Hvað er ókynhneigð (asexual)?

Ókynhneigður einstaklingur er sá sem ekki finnur fyrir kynferðislegri löngun til að stunda kynlíf með öðrum aðila.

08. nóvember 2016

Orðið „asexual“ hefur verið þýtt ýmist sem ókynhneigð eða kynleysi, en sumir asexual Íslendingar notast við enska orðið „asexual“.  Í þessari grein höfum við hjá Áttavitanum valið að nota orðið „ókynhneigð“ hér eftir, en það er hvorki réttara né rangara en að nota „kynlaus“ eða „asexual“.  Íslenskt málkerfi er flókið og ekki öll erlend orð falla vel inn í málið.  Umræða um „asexuality“ er í mótun og hafir þú hugmyndir að betri hugtökum hvetjum við þig til að skilja þau eftir í athugasemdum hér að neðan.

Hvað er ókynhneigð (asexuality)?

Ókynhneigður einstaklingur er sá sem ekki finnur fyrir kynferðislegri löngun til að stunda kynlíf með öðrum aðila.  Ekki rugla ókynhneigð saman við skírlífi, sem oft er tengt trúarbrögðum eða öðrum lífsskoðunum; en ókynhneigð er ekki val heldur kynhneigð, rétt eins og samkynhneigð, gagnkynhneigð og aðrar kynhneigðir.
Flestir ókynhneigðir hafa alltaf verið ókynhneigðir og finna einfaldlega ekki fyrir þessari kynferðislegu löngun sem flestir finna fyrir og laðast ekki að fólki kynferðislega.  Ókynhneigðir geta verið í ástarsamböndum og/eða stundað sjálfsfróun, en það er allt mjög breytilegt eftir einstaklingum og fjölbreytileiki ókynhneigðra talsverður.  Um 1% fólks telst vera ókynhneigt.

Er ókynhneigð vandamál?

Nei, ókynhneigðir líta ekki á ókynhneigð sína sem vandamál sem þarf að laga.  Nokkrar mýtur eru um ókynhneigð sem þarf að uppræta:

  • Þarftu ekki bara að prófa?  -Nei.  Þeir sem eru ekki ókynhneigðir þurfa yfirleitt ekki að prófa að stunda kynlíf til að langa til þess.  Sömuleiðis þurfa ókynhneigðir ekki að prófa að stunda kynlíf til að langa til að sleppa því.
  • Það langar bara engan til að sofa hjá þér og þú ert bitur.  Kjaftæði.  Ókynhneigðir hafa bara ekki löngun til að sofa hjá.
  • Þetta er trúarlegs eðlis.  Nei, aftur; þetta er ekki það sama og skírlífi, heldur er þetta kynhneigð, samofin persónuleika einstaklingsins.

Vilja ókynhneigðir vera í ástarsambandi?

Ókynhneigt fólk hefur þörf fyrir að mynda tilfinningaleg tengsl eins og aðrir og mynda þau á fjölbreytta vegu, líkt og aðrir óháð kynhneigð.  Sumt ókynhneigt fólk kýs að lifa lífi sínu í einveru, aðrir finna hamingjuna í hópi náinna vina á meðan aðrir hafa þörf fyrir að mynda náin ástarsambönd og kjósa að finna sér maka til framtíðar.  Ókynhneigðir eru hvort heldur sem er í sambandi við aðra ókynhneigða eða fólk með aðra kynhneigðir. Það getur stundum verið erfitt fyrir ástarsambönd ef annar aðilinn er ókynhneigður en hinn ekki.  Sumir ókynhneigðir stunda kynlíf með maka sínum, til að eignast börn eða fyrir hinn aðilann.  Það verður hver einstaklingur að velja hvað hann er tilbúinn að gera.

Laðast ókynhneigðir að öðrum?

Margir ókynhneigðir einstaklingar laðast að öðru fólki, en hafa ekki þörf fyrir að fá útrás fyrir aðdráttaraflið á kynferðislegan hátt.  Ókynhneigðir geta samsamað sig gagn-, sam-, pan- eða tvíkynhneigðum og viljað vera í sambandi við einstaklinga af einhverju kyni.  Ókynhneigðir geta líka haft lítinn sem engan áhuga á því að stofna til ástarsambands og kalla sig þá „aromantic“.  Þú getur lesið meira um undirskilgreiningar ókynhneigðar hérna og hérna.

Finna ókynhneigðir fyrir kynferðislegri örvun?

Sumir ókynhneigðir örvast reglulega kynferðislega, þó það tengist ekki löngun til að stunda kynlíf með öðrum. Sumir ókynhneigðir hafa kynhvöt, bara ekki gagnvart öðrum og sækja því ánægju úr sjálfsfróun, en aðrir líta á sjálfsfróun sem stresslosandi athöfn eða líkja þessu við að „hreinsa pípurnar“.  Aðrir ókynhneigðir finna fyrir lítilli eða engri kynferðislegri örvun eða kynhvöt.

Tákn sem ókynhneigðir nota

Talsvert hefur aukist við fánaflóruna í gleðigöngunni og er nú hægt að fjárfesta í fleiri fánum hinsegin fólks heldur en bara hinum þekkta regnbogafána.  Við vildum til gamans fara aðeins yfir þann symbólisma sem ókynhneigðir nota sem sameiningartákn:

  • Fáni: Fáni ókynhneigðra er röndóttur; svartur, grár, hvítur og fjólublár.
  • Ásar: Orðið „Ace“ er notað sem stytting fyrir „asexual“.  Þeir sem eru hrifsnauðir (aromantic) nota spaðaásinn og þeir sem sækjast í ástarsambönd nota hjartaásinn.
  • Kaka: Hvað er betra en kynlíf?  Kaka!  Ókynhneigðir nota köku sem sameiningartákn.


Athugið: Skortur á kynhvöt er ekki óheilsusamlegur, en getur í undantekningartilfellum verið einkenni alvarlegri heilbrigðisvandamála.  Ef þú missir skyndilega áhuga á kynferðislegri örvun ættir þú að fara til læknis til öryggis.


Heimildir:

08. nóvember 2016

Ertu með spurningu?

Full nafnleynd og 100% trúnaður.

 

Staðir tengdir síðu

Spurningar tengdar síðu

Mest lesið

Vinna |  10.05.2017
Vinna |  07.06.2016
Einkalíf |  06.04.2016
Einkalíf |  02.05.2016