Algeng vandamál í samböndum

Hér förum við yfir nokkur vandamál sem geta komið upp í samböndum og leitum lausna við þeim.

20. október 2016

Hlutirnir eru ekki að ganga neitt sérstaklega vel á milli ykkar. Eruði kannski búin að vaxa í sundur? Þurfiði bæði að læra að gera málamiðlanir? Eða þurfið þið aðstoð sérfræðings til að greiða úr ykkar málum? Hér eru nokkur vandamál sem algengt er að komi upp í samböndum og nokkur ráð sem gætu hjálpað til við að leysa þau.

Fyrstu sambandsslitin

Það er algengt að fólk haldi að fyrsta sambandið sé það samband sem muni endast að eilífu. Allt verður svo einstakt og töfrandi. Og jafnvel þó þú gerir þér grein fyrir að tölfræðilega er ekki mjög líklegt að fyrsta sambandið sé það sem muni endast að eilífu, þá getur það verið mikið áfall þegar því lýkur. Það er því mikilvægt að muna, að þrátt fyrir að sambandið muni hugsanlega enda, þá geturðu varðveitt minningarnar og góðu stundirnar. Reynslan mun líka hjálpa þér að halda áfram og finna eitthvað jafnvel betra í framtíðinni.

Ég elska hann/hana en ég er ekki ástfangin(n) lengur

Kannski snúa vandamálin að spennunni í sambandinu. Sú breyting sem á sér stað eftir ákveðinn tíma í sambandi er eðlileg en veldur fólki oft áhyggjum. Þér finnst kannski eins og sambandið sé ekki nógu gott vegna þess að þú ert ekki stanslaust að hugsa um kærastann eða kærustuna. Það sem þarf að hafa hugfast hér er að fyrstu stig þess að vera ástfangin eru oft svo þrúgandi að það getur verið erfitt að einbeita sér að hinu raunverulega lífi á sama tíma. Eftir smá tíma muntu vilja einbeita þér að vinnunni og hitta vini þína oftar. Þetta þýðir þó ekki að sambandið sé komið yfir síðasta söludag, þvert á móti er þetta eðlilegt þróun - nema þá hugsanlega ef mikið er um önnur vandamál.

Fyrsta barn

Rannsóknir sýna að erfiðasta tímabil sambanda er um það leyti þegar fyrsta barnið kemur í heiminn og að jafnvel þó að sambandið endist í 20 ár til viðbótar þá megi rekja ýmis vandamál þess allt aftur að því þegar fyrsta barnið kom í heiminn. Að sjálfsögðu er þó hellingur af foreldrum sem eru hamingjusamir og gengur vel með sitt fyrsta barn. Það er samt gott að vera vel undirbúin(n) og gera sér grein fyrir því að þetta er erfiður tími og því mikilvægt að nýta sér þá hjálp sem í boði er, til dæmis frá ráðgjafa eða ljósmóður eða hjúkrunarfræðingum á heilsugæslustöð.

Ertu viss um að þetta snúist ekki um kynlíf?

Ef að vandamálin snúast um kynlíf, ef að annað hvort ykkar finnur til við samfarir, annað ykkar hefur meiri löngun í kynlíf  en hitt eða annað ykkar fær ekki fullnægingu, þá er góð hugmynd að leita til kynlífsráðgjafa.

Góð ráð til að hjálpa sambandinu

Ef að þið stríðið við einhver vandamál í sambandinu er gott að líta á þessi ráð áður en gengið er alla leið og leitað til ráðgjafa:

  • Ekki eiga mikilvægar samræður eða rökræður eftir kl. 9 á kvöldin. Líkurnar á að þið séuð of þreytt eða jafnvel undir áhrifum alkóhóls eru töluverðar; það er betra að leysa þetta morguninn eftir.
  • Ef að annar aðilinn í sambandinu á erfitt með að opna sig tilfinningalega, á erfitt með að tala eða líður eins og hann sé alltaf truflaður þegar hann talar er góð hugmynd að nota 10 mínútna regluna. Það þýðir að þið setjist niður og ræðið hlutina á rólegu nótunum og hvort um sig fær 10 mínútur til að tjá sig án þess að hinn grípi fram í. Á meðan einn talar hlustar hinn og segir ekkert, heldur gefur manneskjunni frið til þess að tjá sig - og fær svo tækifæri þegar þessar 10 mínútur eru liðnar. Góð hugmynd er að setja sér tímamörk fyrir samtöl af þessu tagi þannig að þau dragist ekki fram úr öllu hófi. Til dæmis er hægt að setja 30 mín samtals í samræðurnar og fara svo og fá sér pizzu eða horfa á mynd saman.
  • Þegar hlutirnir virðast ekki vera alveg að ganga upp er mikilvægt að sýna manneskjunni sem þú elskar virðingu og þolinmæði. Það getur bjargað mörgu að brosa og sýna þakklæti.

Hvenær þarftu pottþétt á sambandsráðgjöf að halda?

Flestir ráðgjafar munu líklega segja þér að það sé síðasta ráð margra para að leita til sambandsráðgjafar. Oft dregst það svo á langinn að leita til ráðgjafa að minnsta kosti öðrum aðilanum í sambandinu  sé farið að standa á sama um það. Þess vegna er gott að leita til ráðgjafa fyrr en síðar, sérstaklega ef:

  • Annað ykkar er mjög óöruggt, þurfandi eða afbrýðisamt og þessir þættir eru að hafa alvarleg áhrif á sambandið.
  • Þið eruð bæði uppstökk og fýld í samskiptum ykkar á milli.
  • Ykkur báðum eða öðru hvoru ykkar líður eins og þið getið ekki rætt tilfinningar við hvort annað.
  • Samræður verða alltaf að rökræðum eða þrætum.
  • Annað ykkar er óhamingjusamt mest allan tíman.
  • Þið eruð hætt að stunda kynlíf.

Hvað kostar sambandsráðgjöf?

Hægt er að fara ýmsar leiðir í sambandráðgjöf en hér að neðan bendum við á nokkrar þeirra.

Ókeypis:

Önnur ráðgjöf: 

  •  Fjölskylduhús býður upp á ýmsar leiðir í ráðgjöf, til dæmis einstaklingsviðtöl, fjölskylduviðtöl og hópavinnu. Einstaklingsviðtal hjá Fjölskylduhúsi (50 mín) kostar 8000 kr. en 6000 kr. ef þú ert skráður í hópavinnu. Hópavinnan ein og sér kostar einnig 8000 kr.
  • Parameðferð Sálfræðiþjónusta býður upp á aðstoð við að skapa nánd og jákvæðni í sambandinu, kynnast hvort öðru betur, bæta samskiptin og kynna nýjar leiðir til þess að leysa úr ágreiningi.

 

Heimildir:

Grein þýdd og staðfærð af The Site.

 

20. október 2016

Ertu með spurningu?

Full nafnleynd og 100% trúnaður.

 

Mest lesið

Einkalíf |  06.04.2016
Vinna |  10.05.2017
Einkalíf |  02.05.2016