Atvinnutorg í Reykjavík

Atvinnutorg hefur það hlutverk að veita ungum, langtíma atvinnulausum stuðning og ráðgjöf við að komast út á vinnumarkaðinn.

18. september 2012

Hvað er atvinnutorg?

Atvinnutorg í Reykjavík er samstarfsverkefni velferðarráðuneytis, Vinnumálastofnunar og velferðarsviðs Reykjavíkurborgar og hefur það hlutverk að veita ungum atvinnuleitendum stuðning og ráðgjöf við að komast út á vinnumarkaðinn. Á Atvinnutorgi veita sérhæfðir atvinnuráðgjafar langtíma atvinnulausum einstaklingum á aldrinum 16-25 ára aðstoð við atvinnuleit og undirbúning fyrir atvinnuþátttöku. Í boði eru margskonar úrræði og tækifæri til að auka atvinnumöguleika fólks í framtíðinni.

Hvar er Atvinnutorg?

Atvinnutorg er staðsett í húsnæði Vinnumálastofnunar, Kringlunni 1, 103 Reykjavík.

Fyrir hverja er Atvinnutorg?

Atvinnutorg er fyrir atvinnuleitendur á aldrinum 16-25 ára sem hafa verið án atvinnu í 6 mánuði eða lengur og þiggja ýmist atvinnuleysisbætur eða fjárhagsaðstoð frá sveitarfélagi sér til framfærslu.

Á Atvinnutorgi fær hver atvinnuleitandi sinn atvinnuráðgjafa sem setur upp einstaklingsáætlun með hverjum og einum með ákveðin markmið að leiðarljósi. Slík áætlun getur innihaldið daglega mætingu á Atvinnutorg, starfsþjálfunartækifæri eða tímabundna ráðningu á vinnustað.

Hvað annað er í boði á Atvinnutorgi?

Boðið verður upp á ýmsar kynningar og námskeið um margt sem tengist atvinnulífinu og því að vera úti á vinnumarkaðnum. Til dæmis verður fjallað um gerð ferilskrár og farið yfir undirbúning fyrir atvinnuviðtöl. Einnig verður rætt um skatta, kjaramál, launaseðla og fleira. Þeir sem eiga í vanda vegna áfengis- eða vímuefnanotkunar gefst kostur á að fara í meðferð við því. Einnig verða í boði ýmis námstengd úrræði fyrir ungt atvinnulaust fólk.

Til hvers að ráða sig í vinnu?

Reynsla úr atvinnulífinu er nauðsynleg til að byggja upp ferilskrá og færir mann nær framtíðarmarkmiðunum. Viti maður ekki nákvæmlega hvert maður stefnir getur ný reynsla gefið hugmyndir um það hvað í boði er á vinnumarkaði.

Ef maður hangir of lengi heima er hætt við að maður dragist ofan í þunglyndi og fyllist kvíða. Því lengur sem maður stendur utan við þjóðfélagið og tekur lítinn þátt, því erfiðara verður að koma sér inn í það á ný. Langvarandi aðgerðarleysi gerir mann óhamingjusaman og óánægðan með sjálfan sig.

Með því að koma lífinu aftur í rútínu losnar maður við slenið, nær betri tökum á sjálfum sér og verður fyrir vikið ánægðari með sjálfan sig. Þegar maður er virkur á vinnumarkaði byggir maður upp sjálfstraust og öðlast skarpari sjálfsmynd og framtíðarsýn. Tengslanetið sem maður myndar á vinnustaðnum gefur manni ekki bara fleiri vini og kunningja, heldur getur það leitt til nýrra tækifæra og aukinna möguleika í atvinnulífinu síðar meir.

Reynslan verður dýrmæt þegar sótt verður um draumastarfið í framtíðinni. Þeir sem hafa lengri tímabil án atvinnuþátttöku eða náms á ferilskránni eiga minni möguleika en þeir sem hafa verið virkir í vinnu og námi. Góð meðmæli frá fyrrverandi vinnuveitendum ráða líka oft úrslitum um það hvaða umsækjandi er ráðinn til starfa.

Eitt getur leitt af öðru en ekkert leiðir af engu!

18. september 2012

Ertu með spurningu?

Full nafnleynd og 100% trúnaður.

 

Réttindi tengd síðu

Mest lesið

Einkalíf |  06.04.2016
Einkalíf |  02.05.2016
Einkalíf |  29.06.2017
Einkalíf |  22.11.2012

Mest lesnu svörin

Heilsa & kynlíf |  25.08.2014 Swag vs. legend