Eistnaskoðun

Skoða þarf hvort stærð eistnanna sé að breytast og hvort hnútar finnist á þeim.  Ástæðan fyrir þessu er að krabbamein í eistum getur komið upp hjá strákum á unglingsaldri og því fyrr sem það uppgötvast því betri líkur eru á að lækna það.

Leiðbeiningar við eistnaskoðun:

• Skoða ætti eistun í hverjum mánuði eftir sturtu eða bað.
• Haldið er með báðum höndum um annað eistað.
• Rúlla skal þumlunum og fingrunum eftir eistanu.
• Leitað er eftir hnútum á eistanu sem eru yfirleitt litlir, eins og baun, hneta eða hrísgrjón. Ofan á hvoru eista er þykkildi, en það eru eistnalyppurnar sem þroska sáðfrumurnar.
• Leita skal einnig eftir breytingu á stærð eistnanna frá síðustu skoðun. Hafa skal í huga að annað eistað, oftast hægra eistað, getur verið aðeins stærra en hitt og er það eðlilegt.
• Ef maður finnur bólgu, hnút, verki eða breytingu á stærð eistnanna er ráðlegt að panta tíma hjá heimilislækni eða ráðfæra sig við hjúkrunarfræðing.
• Þó maður finni hnút í eistunum eða óþægindi þarf ekki að vera að um krabbamein sé að ræða, en rétt er að láta lækni samt alltaf skoða það.