Það eru til ótal starfsstéttir í heiminum og það getur verið erfitt að velja hvað maður vill verða. Sumir fást aðeins við eitt starfssvið út ævina, á meðan aðrir flakka á milli starfsstétta og takast á við mörg mismunandi verkefni. Í greinaröðinni Hvernig verð ég […]? ætlum við að fara yfir leiðina að mismunandi störfum. Hér beinum við sjónum okkar að sjúkraliðastarfinu.
Hvað gerir sjúkraliði?
Sjúkraliði er löggiltur heilbrigðisstarfsmaður og ber ábyrgð á störfum sínum og starfsþróun sem slíkur. Starf sjúkraliða er mjög fjölbreytt og enginn dagur eins. Þeir veita skjólstæðingum sínum viðeigandi aðstoð, allt frá stuðningi og hvatningu til athafna daglegs lífs til sérhæfðrar hjúkrunar á mjög veikum skjólstæðingum. Sjúkraliðar starfa við heilbrigðisþjónustu á viðurkenndum heilbrigðisstofnunum og á heimilum skjólstæðinga. Sjúkraliðar sinna nærhjúkrun og metur andlegt, félagslegt og líkamlegt ástand skjólstæðinga í samráði við annað fagfólk. Sjúkraliðar tileinka sér þekkingu á ákveðnu sérsviði hjúkrunar og taka þátt í hjúkrun og við að aðstoða og leiðbeina sjúklingum í athöfnum daglegs lífs. Þeir þurfa einnig að hafa eftirlit með og fyrirbyggja fylgikvilla sem geta komið upp í kjölfar rúmlegu sem og að leiðbeina sjúklingum við endurhæfingu. Einnig leiðbeina þeir aðstoðarfólki við aðhlynningu og aðstoða við aðlögun nýrra starfsmanna þegar það á við og sinna forvörnum.
Hvernig veit ég hvort sjúkraliðastarfið sé eitthvað fyrir mig?
Ef þú hefur gaman af því að hugsa um annað fólk, ert góð/ur í mannlegum samskiptum og átt auðvelt með að sýna öðrum hlýju og nærgætni er líklegt að sjúkraliðastarfið gæti hentað þér. Einnig ef þú hefur áhuga á mannslíkamanum, andlegri vellíðan fólks og heilsu almennt. Starf sjúkraliðans getur verið krefjandi bæði andlega og líkamlega, en það er líka mjög gefandi og áhugavert.
Hvar lærir maður að verða sjúkraliði?
Sjúkraliðanám er 204 eininga viðurkennt starfsnám og geta nemendur sótt um löggildingu starfsheitis til Embættis Landlæknis að lokinni brautskráningu. Námið skiptist í almennar greinar, heilbrigðisgreinar og sérgreinar. Nám í sérgreinum er bæði bóklegt og verklegt nám í skóla og starfsnám á heilbrigðisstofnunum. Meðalnámstími eru 3 ár í skóla að meðtalinni 16 vikna starfsþjálfunar. Nemandi þarf að hafa náð 18 ár aldri til að geta hafið vinnustaðanám á heilbrigðisstofnun og er miðað við fæðingardag.
Þeir skólar sem bjóða upp á sjúkraliðabraut eru:
- Fjölbrautaskólinn við Ármúla
- Fjölbrautaskólinn í Breiðholti
- Fjölbrautaskóli Norðurlands Vestra
- Fjölbrautaskóli Suðurlands
- Fjölbrautaskóli Suðurnesja
- Fjölbrautaskóli Vesturlands
- Framhaldsskólinn í Vestmannaeyjum
- Menntaskólinn á Ísafirði
- Verkmenntaskóli Austurlands
- Verkmenntaskólinn á Akureyri
Hvar mun ég svo starfa sem sjúkraliði?
Sjúkraliðar starfa innan heilbrigðiskerfisins, til dæmis á sjúkrahúsum, hjúkrunarheimilum, heilsugæslustöðvum, sambýlum fyrir fatlaða og í heimahúsum svo dæmi séu tekin. Atvinnumöguleikar sjúkraliða eru taldir mjög góðir en með hækkandi lífaldri fólks eykst stöðugt fjöldi þeirra sem þurfa á umönnun að halda.
HVAÐ SEGIR ÞÚ UM ÞETTA EFNI?