Hvar finn ég kærasta?

Sæl og kærar þakkir fyrir spurninguna.

Við viljum auðvitað öll finna fyrir væntumþykju og er það langt í frá að vera „desperate.“

Fötlun ætti nú ekki að vera ástæða fyrir því afhverju þú eigir ekki kærasta og ef einhver lætur þér líða þannig á sú manneskja þig einfaldlega ekki skilið, ekki flóknara en svo.

Ef eina markmiðið er að eignast kærasta getur það hinsvegar verið vandamálið. Hlutirnir  gerast nefnilega þegar maður á síst von á þeim. Svipað og að horfa á málningu þorna… hún bara þornar ekki ef maður situr og bíður, suðan kemur ekki fyrr upp við að stara í pottinn…

Þú ert ung og er þetta svo sannarlega tíminn til að kynnast sjálfri sér og njóta frelsisins, ekki satt. Þú getur nýtt tímann í að finna út hvað það er sem þú raunverulega vilt í lífinu, hvaða kosti þarf tilvonandi maki að hafa? Hvernig sambandi viltu vera í? Hver vilt þú vera? Hvað viltu gera í framtíðinni? Hvernig kærasta vilt þú vera? Og þar fram eftir götunum.

Til að kynnast nýju fólki getur verið sniðugt að fara á staði þar sem þú telur að mögulegt mannsefni sé að finna sem hentar þér. Hver eru áhugamál þín? Leitaðu á staði þar sem strákar eru sem deila mögulega sömu áhugamálum og þú. Heilla fótboltastrákar þig? Mættu á leik. Viltu einhvern fyndinn… skelltu þér á uppiststand… o.s.frv.

Svo er hægt að mæta á speed dating/friending sem t.d. Loft Hostel býður upp á, Tinder ef það er enn eitthvað fútt í því… bara vera ófeimin við að brjóta ísinn. Ef þér líst vel á einhvern, hafðu hugrekkið í að byrja að spjalla.

Mundu bara að það þarf að þora til að skora.

Gangi þér vel í makaleitinni.

Mbk.

Áttavitinn ráðgjöf.