Hvernig á að flokka?

Flest okkar höfum við kynnst flokkun á einhvern hátt. Við vitum kannski að pappírinn fer í pappatunnu, plastið í plasttunnu og óflokkanlegur heimilisúrgangur fer í almennu svörtu tunnuna.

En hvað með öll vafamálin? Á að flokka bökunarpappír í pappa? Fara glerkrukkur í almennt sorp? Hvað með áldósir? Hvert fara þær?

Hvernig flokkast ólík efni?

Byrjum á byrjuninni: Hér eru helstu flokkar samkvæmt leiðbeiningum Sorpu.

• Nytjahlutir; t.d. nothæfir og seljanlegir hlutir eins og borðbúnaður, leikföng, raftæki og húsgögn. Nytjahlutum er skilað í nytjagáma á endurvinnslustöðvum.
• Föt og klæði; t.d. gluggatjöld, sængurver, teppi, koddar og fatnaður. Föt og klæði eru sett í poka og skilað í grenndargáma Rauða krossins eða á endurvinnslustöðvar.
• Pappír og pappi, t.d. fernur, pítsukassar, dagblöð og auglýsingapóstur. Pappír og pappi fer í bláu tunnuna, í grenndargáma eða á endurvinnslustöðvar.
• Plast; t.d. einnota plastumbúðir, dollur, bakkar og brúsar. Plast fer í grenndargáma eða á endurvinnslustöðvar.
• Flöskur og dósir; t.d. úr áli, plasti og gleri. Flöskur og dósir fara á endurvinnslustöðvar eða í grenndargáma grænna skáta.
• Málmar; t.d. niðursuðudósir, álpappír, álbakkar, málmlok af krukkum, sprittkertakoppar og rafmagnsvírar. Málmum er skilað á endurvinnslustöðvar eða sett beint í svörtu tunnuna (ekki í poka).
• Gler og steinefni; t.d. speglar, flísar, glerkrukkur, múrsteinar, postulín og keramikmunir. Gler og steinefnum er skilað á endurvinnslustöðvar.
• Lífrænn úrgangur; t.d.matarleifar, afgangar, bleyjur og gæludýraúrgangur. Lífrænn úrgangur fer í svörtu tunnuna í poka.
• Spilliefni og raftæki; t.d. rafhlöður, spreybrúsar, málning, olíuefni, ljósaperur og ónýt raftæki. Spilliefni og raftæki fara í spilliefna- og raftækjgáma á endurvinnslustöðum.

Leysum úr vafamálum!

Hér er listi yfir ýmis vafamál sem geta komið upp við flokkun:

• Bökunarpappír fer í svörtu ruslatunnuna,
• Maskari flokkast í plast og alment rusl (skola hylkið og setja í plast),
• Sellófan er ekki plast og fer í svörtu ruslatunnuna,
• Gluggaumslög má setja beint í pappa,
• Það á að hreinsa úr tannskremstúpum og barnaskvísum eins og hægt er; áður en þær eru síðan flokkaðar,
• DVD diskar mega fara í plast en spólur fara í almennan úrgang,
• Maíspokar fara í almennan úrgang eða jarðgerðarfarveg,
• Rakblöð úr plasti og stáli mega fara í plast,
• Tómum lyfjaspjöldum á að skila í apótek,
• Snyrtivörur flokkast ekki alltaf sem spilliefni, t.d. krem, augnskuggar,
• Naglalökk og ilmvötn flokkast þó sem spilliefni,
• Pumpur á ilmvatnsglösum og sápubrúsum eru oftast flokkaðar sem plast,
• Pokar undan örbylgjupoppi fara í almennt rusl,
• Kveikjara á að setja í spilliefni sé gas í þeim. Annars eru þeir flokkaðir í málm eða plast; eftir því sem við á,
• Prenthylki flokkast sem spilliefni en plast ef þau eru tóm. Tónerar úr stærri vélum flokkast sem raftæki,
• Gleraugu er hægt að fara með í nytjagám Góða hirðisins ef þau eru nothæf. Ef ekki, þá flokkast þau eftir þeim efnivið sem er mest af í þeim, t.d. plast, gler eða málmur,
• Kassakvittanir fara í pappír,
• Niðursuðudósir mega fara pokalaust í svörtu tunnuna.

Ertu ennþá óviss um eitthvað? Hér má leita sérstaklega eftir flokkun ákveðinna hluta/efna.

• Athugið. Greinin miðar við flokkunarkerfi Sorpu, það getur verið mismunandi eftir bæjarfélögum, fyrirtækjum og stofnunum hvernig er flokkað. Því mælum við með því að allir skoði hvernig flokkun er háttað í sínum heimabæ.