Það eru til ótal starfsstéttir í heiminum og það getur verið erfitt að velja hvað maður vill verða. Sumir fást aðeins við eitt starfssvið út ævina, á meðan aðrir flakka á milli starfsstétta og takast á við mörg mismunandi verkefni. Í greinaröðinni Hvernig verð ég […]? ætlum við að fara yfir leiðina að mismunandi störfum. Hér beinum við sjónum okkar að hársnyrtinum.
Hvað gerir hársnyrtir?
Flest okkar hafa einhverntíman látið klippa á okkur hárið, hvort sem við höfum gert það á hárgreiðslustofu eða hjá einhverjum vini eða fjölskyldumeðlimi (nú eða bara sjálf). Ef við förum á hárgreiðslustofu þá eru það hársnyrtar sem sjá um að klippa okkur, lita eða hvað svo sem við kunnum að biðja um. Það er þó aðeins meira falið í því að vera hársnyrtir en einungis að klippa hár og meðal annars eru þetta verkefni hársnyrta:
- Taka á móti viðskiptavinum, kynna sér óskir þeirra og ráðleggja hvaða meðhöndlun hentar hverju sinni.
- Gefa ráð varðandi hárþvott og almenna umhirðu hársins.
- Velja klippingu í samráði við viðskiptavin, með hliðsjón af andlitsfalli, höfuðlagi og tísku.
- Klippa, snyrta og þurrka hár viðskiptavinarins
- Hárþvottur og höfuðnudd
- Lita hár, t.d. með strípum, partalitun, rótarlitun eða heillitun.
- Leggja, blása og greiða hár eftir óskum viðskiptavinarins.
- Selja hársnyrtivörur og leiðbeina kúnnanum við notkun þeirra.
- Fylgjast með tískustraumum og nýjungum í faginu.
- Þjónusta viðskiptavini.
Hvernig veit ég hvort hársnyrtiiðn sé eitthvað fyrir mig?
Hefur þú gaman af að fikta í hári? Hefurðu áhuga á tísku í litum og stíl? Langar þig að vinna í skapandi og fjölbreyttu starfi? Áttu auðvelt með að vinna með fólki? Ef þetta á við um þig og ef þú ert fær í að vinna í höndunum og ert nákvæm(ur) gæti hársnyrtiiðnin hentað þér mjög vel.
Hvar lærir maður að verða hársnyrtir?
Hársnyrtiiðn er löggilt iðngrein* og er kennd við fjóra skóla á landinu. Markmið námsins er að veita almenna og faglega undirstöðumenntun í greininni sem og að auka færni nemenda meðhöndlun hársnyrtavara og beitingu áhalda. Námið er að meðaltali fjögur ár; samtals fimm annir í skóla og 72 vikna samningsbundið vinnustaðanám. Námið er 168 einingar og því lýkur með sveinsprófi sem veitir starfsréttindi í greininni sem og inngöngu í nám til iðnmeistaraprófs. Hársnyrtiiðn er kennd í þessum skólum:
Hvar mun ég svo starfa sem hársnyrtir?
Sem hársnyrtir getur þú starfað á hárgreiðslustofum, rakarastofum eða heildsölum sem selja vörur sem tengjast starfinu. Einnig eru hársnyrtar oft með eigin stofu eða sjálfstætt starfandi.
_
*Löggilt Iðngrein: Þýðir að eingöngu þeir sem hafa lokið sveinsprófi í hársyrtiiðn meiga starfa við greinina.
HVAÐ SEGIR ÞÚ UM ÞETTA EFNI?