Hvernig á að nota túrtappa ?

Þegar þú byrjar að nota túrtappa er best að nota minnstu gerð (þeir eru til í mismunandi stærðum). Í fyrsta skiptið getur verið gott að prufa þegar blæðingar eru alveg byrjaðar, þá er auðveldara að koma honum upp.

1. Þvoðu þér um hendur og taktu plastið utan af tappanum.
2. Komdu þér svo fyrir í þægilegri stöðu, sumar konur hafa annan fótinn upp á einhverju, t.d. baðkarsbrún en öðrum finnst betra að beygja sig alveg niður.
3. Taktu svo um miðjan tappan og passaðu að sá endi sem spottinn er í snúi niður.
4. Þú notar svo hina höndnina til að opna skapabarma svo þú getir þrýst tappanum inn í leggöngin. Hann ætti að fara alveg allur inn.

Athugaðu að á myndinni er notaður sérstakur stautur til að setja tappann á sinn stað en hún sýnir vel staðsetningu túrtappans.

Ef það gengur illa að koma túrtappanum inn, þá gætir þú prufað að nota smá sleipiefni (t.d. K-Y gel) og einnig getur verið hjálplegt að nota spegil í fyrsta skiptið. Ef það er vont að setja tappann inn þá ættir þú að stoppa og prófa síðar. Aldrei þröngva honum inn. Skipta ætti um túrtappa á 4-6 klst. fresti.