Hvað er fasteignaskattur?

Fasteignaskattur, eða fasteignagjöld, er innheimtur af sveitarfélögum og leggst á allar fasteignir innan bæjarmarka sveitarfélagsins. Fasteignaskattur er misjafnlega hár eftir sveitarfélögum en er þó ávallt innan ákveðins ramma. Fasteignagjöld eru skattar sem allir fasteignaeigendur þurfa að greiða. Gjöldin skiptast í þrjá liði í Reykjavík, en þeir eru:

  • fasteignaskattur,
  • lóðarleiga,
  • sorphirðugjald og gjald vegna endurvinnslustöðva.

Hversu há eru fasteignagjöld?

Fasteignagjöld eru reiknuð á fasteignir sem ákveðið hlutfall af fasteignamati þess. Skatturinn er mis hár eftir sveitafélögum en þó ávallt innan ákveðins ramma.

  • A-skattur er lagður á íbúðarhúsnæði og er að hámarki 0,625% af fasteignamati.
  • B-skattur er lagður á opinberar byggingar og er að hámarki 1,32% af fasteignamati.
  • C-skattur er lagður á atvinnuhúsnæði og annað húsnæði sem ekki fellur í flokka A og B. Hann er að hámarki 1,65% af fasteignamati.

Fasteignaskattur í Reykjavík er eftirfarandi:

  • A-skattur er 0,18% af fasteignamati.
  • B-skattur er 1,32% af fasteignamati.
  • C-skattur er 1,65% af fasteignamati.

Lóðagjöld í Reykjavík eru sem hér segir:

  • A-skattur er 0,2% af fasteignamati.
  • B-skattur er 1,0% af fasteignamati.
  • C-skattur er 1,0% af fasteignamati.

Sorphirðugjöld í Reykjavík

Sorphirðugjald í Reykjavík miðast við fjölda ruslatunna, stærð þeirra og tíðni losana.

  • Svarta tunnan sem inniheldur blandaðan úrgang er losuð á 14 daga fresti. Árið 2019 er gjaldið 23.900kr fyrir 240L tunnu, 13.500kr fyrir 120L tunnu.
  • Bláa tunnan sem er undir endurvinnanlegan pappír og pappa er losuð á 21 daga fresti. Árið 2019 er gjaldið 9.650kr fyrir 240L tunnu.
  • Græna tunnan er undir endurvinnanlegt plast, hún er tæmd á 21 daga fresti. Árið 2019 er gjaldið 8.200kr fyrir 240L tunnu.
  • Standi sorptunna lengra en 15 metra frá þeim stað, þar sem ruslabíll kemst næst henni, þarf að greiða 5.900 kr. álag á hverja 240 lítra sorptunnu sem losuð er á 14 daga fresti en 3.900 kr. álag á tunnu sem losuð er á 21 daga fresti.

Þeir sem kjósa að flokka sorp til endurvinnslu geta fækkað ílátum, stærð þeirra eða losunartíðni og þannig lækkað sorphirðugjöld sín. Hægt er að lesa sér betur til um það á vefsíðu Reykjavíkurborgar.

  • Var efnið hjálplegt?
  •    Nei

Ert þú með spurningu?

Öflugt ráðgjafarteymi sérfræðinga svarar spurningum þínum; um kynlíf, námið, sjálfsmyndina, þunglyndi, fíkn, sambönd eða hvað annað sem þér liggur á hjarta. Full nafnleynd og 100% trúnaður.

Spyrja spurningar